अॅपल कंपनीच्या मॅनेजरची पोलिसांकडून गोळी झाडून हत्या

लखनऊ : रायगड माझा वृत्त 

उत्तर प्रदेशची राजधानी लखनऊमध्ये एका पोलिस कॉन्स्टेबलनं अॅपल कंपनीच्या मॅनेजरची गोळी झाडून हत्या केल्याची घटना शुक्रवारी घडली आहे. हत्या करण्यात आलेल्या मॅनेजर यांचं नाव विवेक तिवारी असून ते शुक्रवारी रात्री आयफोन लॉन्चिंगचा एक कार्यक्रम आटपून घरी जात असताना ही घटना घडली.

शुक्रवारी रात्री विवेक तिवारी आयफोन लॉन्चिंगचा एक कार्यक्रम संपल्यानंतर आपल्या गाडीनं घरी जात असताना पोलिसांनी त्यांना गाडी थांबण्याचा इशारा केला. त्यानंतर विवेक यांची पोलिसांसोबत बाचाबाची झाली आणि हे प्रकरण वाढलं. प्रकरण वाढल्यानंर पोलिस कॉन्स्टेबल प्रशांत चौधरी यानं विवेक यांच्यावर गोळी झाडली. यानंतर विवेक यांना तत्काळ हॉस्पिटलमध्ये दाखल करण्यात आलं. मात्र, उपचारादरम्यान त्यांचा मृत्यू झाला.

‘विवेक यांना गाडी थांबवण्याचा इशारा केल्यानंतरही त्यांनी गाडी थांबवली नाही, उटल माझ्या अंगावर गाडी घालण्याचा प्रयत्न केला’ त्यामुळं स्वत:चा बचाव करण्यासाठी मी त्यांच्यावर गोळी झाडली असं संबंधित घटनेतील पोलिस कॉन्स्टेबलनं म्हटलं आहे. असं असलं तरी घटनेतील पोलिस कॉन्स्टेबलला कलम ३०२ अधिनियम अंतर्गत अटक करण्यात आली असून या घटनेची सखोल चौकशी सध्या सुरू आहे.

प्रत्यक्षदर्शींनी सांगितलेल्या माहिती नुसार पोलिसांच्या तावडीतून वाचण्यासाठी त्यांनी पोलिसांवर गाडी चढवण्याचा प्रयत्न केला. गाडी चढवत असताना त्यांची गाडीची जवळच उभी असलेल्या पोलिसांच्या बाइकला टक्कर लागली. म्हणून कॉन्स्टेबल प्रशांत चौधरीनं विवेक यांच्यावर गोळी झाडली. विवेक यांचा मृत्यू बंदुकीतून झाडलेल्या गोळीमुळं झाला नाही तर गाडीच्या धडकेत जखमी झाल्यामुळं झाल्याचा दावा करण्यात येत आहे. असं असलं तरी शवविच्छेदनाचा अहवाल आल्यानंतर खरं काय ते स्पष्ट होईल असं पोलिस अधिकाऱ्यांनी म्हटलं आहे.

अपघात नसून हत्या; पत्नीचा आरोप

हा अपघात नसून हत्या असल्याचा आरोप विवेक यांची पत्नी कल्पना यांनी केला आहे. एका वृत्तवाहिनीशी बोलताना त्यांनी पोलिस कॉन्स्टेबलनं विवेक यांच्यावर केलेले आरोप धुडकावून लावले आहेत. रात्री दीड वाजल्याच्या सुमारास माझं विवेक यांच्याशी बोलणं झालं होतं. त्यांची सहकारी सना त्यांच्यासोबत आहे हे देखील मला माहीत होतं. पोलिसांनी त्यांच्यावर गोळी का झाडली याची संपूर्ण चौकशी व्हायला हवी. मुख्यमंत्री योगी आदित्यनाथ येतील तेव्हाच विवेक यांच्यावर अंतिम संस्कार केले जातील असंही त्यांनी म्हटलं आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत