भाजप-सेनेची काँग्रेस आणि राष्ट्रवादीतील विद्यमान आमदारांना आपल्याकडे खेचण्याची रणनिती

आपल्या पक्षाचे सर्वाधिक आमदार निवडून आणून मुख्यमंत्री पदावर दावा ठोकण्यासाठी दोन्ही पक्षातील नेते कामाला लागले आहेत.जोरदार प्रचार करून आपापल्या उमेदवारांना निवडून आणण्यासाठी दोन्ही पक्षांना झटावे लागणारच आहे. मात्र त्याआधी काँग्रेस आणि राष्ट्रवादीतील विद्यमान आमदारांना आपल्या पक्षात खेचून आणल्यास त्यांना उमेदवारी देण्यात आणि पुन्हा निवडून आणण्यात फारशा अडचणी येणार नाहीत, याची दोन्ही पक्षांतील नेत्यांना पुरेपूर कल्पना आहे. आगामी विधानसभा निवडणूक लढविताना शिवसेना-भाजप यांच्यात युती होणार की, हे दोन्ही पक्ष स्वतंत्रपणे लढणार; हे अजून निश्चित झालेले नाही. मात्र लोकसभेप्रमाणेच विधानसभेतही युती झाल्यास जागा वाटपामध्ये विद्यमान आमदारांच्या जागा कायम ठेवण्याचे अलिखित सूत्र राहणार आहे. त्यामुळेच शिवसेना आणि भाजपने आपापल्या पक्षाच्या आमदारांची संख्या वाढविण्यासाठी काँग्रेस आणि राष्ट्रवादीतील विद्यमान आमदारांना आपल्याकडे खेचण्याची रणनिती आखली आहे.

आता शिवसेनेने पुन्हा राष्ट्रवादीकडे आपला मोर्चा वळवत शहापूरचे राष्ट्रवादीचे आमदार पांडूरंग बरोरा यांना आपल्या पक्षात घेतले. भाजपने वडाळा येथील काँग्रेसचे आमदार कालिदास कोळंबकर यांनाही गळाला लावले आहे. मुंबई उपनगरातील काँग्रेसच्या अन्य एका आमदाराशीही भाजपचे बोलणे सुरू असल्याचे कळते. याशिवाय विखे पाटील यांच्या माध्यमातून आणखी काही काँग्रेस आमदारांशी भाजपचे बोलणे सुरू असल्याचे कळते. शिवसेनेने वसई, विरार, नालासोपारा पट्ट्याकडे लक्ष केंद्रीत केले असून तेथून काहीजणांना शिवसेनेत खेचण्याचे प्रयत्न सुरू असल्याचे कळते. भाजप आणि शिवसेना यांच्यात लोकसभेला युती झाली होती.

ही युती जाहीर करतानाच विधानसभा निवडणुकांसाठी निम्म्या निम्म्या जागा वाटून घेण्याबाबतचाही निर्णय जाहीर करण्यात आला होता. भाजपला लोकसभेत जोरदार यश मिळाल्यानंतर त्यांचे महाराष्ट्रात पुन्हा पारडे जड झाले आहे. असे असले तरी विधानसभा निवडणुकाही आम्ही युतीमध्येच लढणार असल्याचे भाजपच नेतृत्वाकडून वारंवार सांगितले जात आहे. हे दोन्ही पक्ष विधानसभा निवडणूक युती म्हणून लढविणार असले तरी मुख्यमंत्री आपल्याच पक्षाचा व्हावा यासाठी दोन्ही पक्षांनी कंबर कसली आहे.  त्यामुळे पक्षाचे आमदार वाढविण्याचा हा अनोखा मार्ग शिवसेना आणि भाजपन या दोन्ही पक्षांनी अवलंबला आहे. भाजपने विरोधी पक्षनेते राधाकृष्ण विखे पाटील यांना काँग्रेसमधून फोडल्यानंतर शिवसेनेने राष्ट्रवादीतून जयदत्त क्षीरसागरांना आपल्या पक्षात घेतले.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत