मतदान केंद्रावर मीडियाने गर्दी केल्याने राज ठाकरे संतापले

मुंबई: रायगड माझा वृत्त

लोकसभा निवडणुकीच्या चौथ्या टप्प्याचं मतदान महाराष्ट्रात संथगतीनं सुरू असलं तरी काही मतदान केंद्रावर मतदारांची गर्दी पाहायला मिळत आहेत. मुंबई, ठाण्यात लोकांना तासन् तास रांगेत उभं राहावं लागत आहे. मनसे अध्यक्ष राज ठाकरे यांनाही आज तब्बल पावणे दोन तास रांगेत उभं राहावं लागलं.

राज ठाकरे हे दक्षिण मध्य मुंबई मतदारसंघात राहतात. त्यांनी दादरमधील बालमोहन विद्या मंदिर शाळेत मतदान केलं. मतदानासाठी सकाळी पावणे बाराच्या सुमारास ते मतदान केंद्रावर पोहोचले. राज यांच्या आई कुंदा ठाकरे, पत्नी शर्मिला, मुलगा अमित व मुलगी उर्वशी हेही त्यांच्यासोबत होते. मतदान केंद्रावर पोहोचल्यानंतर त्यांनी मतदानासाठी रांग लावली. राज यांच्या आई ज्येष्ठ नागरिक असल्यानं त्यांना लगेच मतदान करता आलं. मात्र, राज यांना पावणे दोन तास रांगेत उभं राहावं लागलं. मतदान केंद्रावर असलेली गर्दी, व्हीव्हीपॅट पावतीसाठी होणाऱ्या विलंबाचं कारण यासाठी देण्यात येत होतं. अखेर पावणे दोन तासांच्या प्रतीक्षेनंतर दीडच्या सुमारास त्यांनी मतदानाचा हक्क बजावला.

माध्यमांवर संतापले!

यावेळच्या लोकसभा निवडणुकीत मनसेनं घेतलेली भूमिका व प्रचाराच्या धडाक्यामुळं राज पुन्हा एकदा चर्चेच्या केंद्रस्थानी आले आहेत. त्यामुळं त्यांची छबी टिपण्यासाठी प्रसारमाध्यमांच्या प्रतिनिधींनी सकाळपासूनच बालमोहन शाळेच्या बाहेर गर्दी केली होती. त्यामुळं प्रचंड रेटारेटी झाली. वृद्ध मतदारांना केंद्रात जाता-येताना त्रास होत होता. ते पाहून राज ठाकरे मीडियाच्या प्रतिनिधींवरही संतापले. एका कॅमेरामनला त्यांनी हाताला धरून बाजूला केले आणि एका आजीबाईंना वाट करून दिली.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत